fbpx

Żaren – Storja miktuba minn Mandy Cilia

Miktub minn
Reklam

Miskin Żaren, ħallina wkoll. Ruħu taret imma ġismu kien għadu fil-kamra mortwarja. Għal darba ma kinx waħdu għax l-erba’ uliedu kienu hemm preżenti biex jarawh għall-aħħar darba. Iva, kollha hemm kienu fl-istess kamra ma’ missierhom jisfurzaw kemm jifilħu biex forsi ma tafx kif toħroġilhom xi demgħa minn għajnejhom għall-għajn in-nies.

Wara li ħallietu martu ħajtu nbidlet ta’ taħt fuq. Dam is-snin jgħix waħdu minsi minn kulħadd ġo daru sakemm saħħtu ma felħitx aktar u kellu jara x’ħa jagħmel. Ħadd minn uliedu ma seta’ jdur bih bil-ħajja mgħaġġla tal-llum, hekk kienu qalulu meta saqsihom jistax imur jgħix ma’ xi ħadd minnhom, allura l-unika triq li kien fadallu hi li jmur ġo dar tal-anzjani, u hemm reġa’ beda jgħix mill-ġdid.

F’temp ta’ ftit ġimgħat kien għamel bosta ħbieb u kulħadd kienu jieħu gost bil-kumpanija tiegħu u sa fl-aħħar kien reġa’ beda jħossu tajjeb minn wara l-mewt tal-għażiża martu. Fil-ħames snin li għamel hemm rari kont tarah bil-geddum. Dejjem daħkan u jiċċajta ma’ kulħadd, biss meta kien jara lil sħabu imdawrin mall-familji tagħhom li kienu jiġu jżuruhom ta’ sikwit kienu jaqbduh dwejjaq kbar għaliex ħadd minn uliedu ma kien isib il-ħin biex imur jarah ftit. Kienu jgħaddu x-xhur biex forsi jieħu aħbarhom.

Tgħidx kemm kien jitlob qabel jorqod biex forsi mqar għal ftit minuti jkollu x-xorti li jara l-uliedu kollha qabel imur għand il-ħallieq. Iżda t-talb tiegħu nstema’ tard għax għalkemm kollha kienu hemm preżenti quddiem missierhom, hu kien ħafna ‘l bogħod minnhom. Malli l-barranin ħarġu mill-kamra, uliedu waqqfu mir-reċtar tal-biki u dlonk isserjaw.

Kellhom wisq affarijiet x’jiddiskutu issa la darba ġie nieqes missierhom u dak li kien hemm miktub fil-wirt kien wisq ta importanza għalihom. Lanqas biss taw ċans ġisem missierhom jiksaħ jew mqar qalu talba għal ruħu biex isib il-mistrieħ ta’ dejjem.

Reklam

Ixxerja din il-paġna

Share on facebook
Facebook
Share on twitter
Twitter
Share on linkedin
LinkedIn

Ara wkoll

Reklam
Reklam

Ipparteċipa f'TEK TEK

Għandek xi kitba, ritratti jew filmati? 

Reklam
Reklam
EnglishMaltese