fbpx

Meta Nemnem Il-Musbieħ (L-Ewwel Kapitlu – Parti e

Miktub minn
Reklam

“Lacey”

Sew konna smajna kien missiera qed jgħajtilha minn ġot-taraġ. Dak il-ħin insejt it-tgħarrix u ċ-ċajt kollu u erġajt ħassejt bħal kesħa kbira ddur ġo ġismi. Lanqas qatt ma naf li tela’ ’l hemm fuq matul il-lejl. Min-naħa kont niggustah għax dejjem smajtu jgħid:

“Jien fis-sular ta’ fuq m’għandix għalfejn nitla. Fl-ewwel żewġ sulari tad-dar għandi kollox. It-tielet sular huwa privat għalik Lacey.”

  U niftakar dakinhar darba minnhom dar lejja u qalli:

“U jekk tibqa’ ġġib rispett lil binti kif dejjem għamilt f’dawn l-aħħar xhur dak is-sular tibqa’ tgawdih magħha.”

Stramba kif dak il-lejl kien tela’ hemm fuq għalkemm sa dak il-ħin kien għadu fit-taraġ. Jien u Lacey tajna ħarsa kurjuża lejn xulxin u Lacey kienet pronta qaltlu biex jibqa’ tiela’.

“Ġej xi lejl twil mid-dehra hux?”, qalilna hekk kif daħal fil-kamra tas-sodda tagħna u xegħel id-dawl. Insomma iktar nista’ ngħid li ta’ Lacey l-kamra milli tagħna imma issa kont ilni għal dawn l-aħħar erba’ ġimgħat ngħix magħhom. Fuq wiċċu kellu tbissima li kienet turi li dak li qal kien qalu biċ-ċajt.

“Ngħidilkom il-verità qisu ma setax jaqbadni ngħas u smajtkom qed tidħku u ddeċidejt li nitla’ sa ħdejkom, jekk dejjem ma ndejjaqkomx”

“Hux iddejjaqna pà min jisimak. Mela din mhux darek wara kollox?”

Stramba l-ħaġa hux? Kif jista’ jkun semagħna nidħku mis-sular ta’ isfel? L-affari xejn ma daqqitli u wisq bdejt nibża’ li kien qiegħed jissuspetta xi ħaġa.

Wara li Lacey qaltlu dak il-kliem wiċċu qisu sserja u tagħni ħarsa li xejn ma għoġbitni, qisu rid jgħid xi ħaġa biha. Imma fil-verità ma qal xejn. U fuq wiċċu reġgħet tfeġġet it-tbissima li kellu ftit sekondi qabel.

“X’nagħmlu? Nilagħbu logħba karti jew?”

U hekk sar għax qattajna l-isbaħ siegħa nilagħbu il-famuża Xaka. Il-logħba favorita ta’ Paul. Logħba li qatt ma kont smajt biha qabel iltqajt miegħu. Skontu kienet ġiet ivvintata mill-bużnannu tiegħu u baqgħu jilagħbuha. Wara din is-siegħa kemm Paul u kemm Lacey dehru li kienu għajjew ġmielhom, l-iktar Paul li tgħidx kemm beda jagħti bir-ras. Saħansitra ħin minnhom tista’ tgħid li raqad bil-karti f’idu u ma qamx qabel semagħna nfaqqaw id-daħk.

“Aħjar tinżel torqod pà għax ħa tispiċċa tieħu xi tisbita minn fuq is-sodda.

“Naħseb aħjar ta. Ħa nara nħallikomx u grazzi tal-kumpanija tagħkom. Kelli bżonnha illejla.”

Ma’ dak il-kliem Paul qam, tefa’ l-kamra u nizel l-isfel bilmod. L-espressjoni ta’ wiċċ Lacey kienet waħda ta’ sorpriża xħin ħarset lejja u donna ridet tgħidli, dan x’tah illum? Imma minflok tagħtni bewsa u intefgħet taħt il-frixx. Jien għamilt l-istess bit-tir li jirnexxieli norqod imma le. Kien jidher li ġej lejl twil u kollu ħsibijiet għalija. Blossom il-qattus li kien qam hekk kif Paul xegħel id-dawl tal-kamra u mar iħuf ma’ kull kantuniera tad-dar, reġa’ sab ruħu fuq is-sodda. U jien? Jien bqajt newden u newden nistenna l-ewwel raġġi tax-xemx ifeġġu mit-tieqa.

Reklam

Ixxerja din il-paġna

Share on facebook
Facebook
Share on twitter
Twitter
Share on linkedin
LinkedIn

Ara wkoll

Reklam
Reklam

Ipparteċipa f'TEK TEK

Għandek xi kitba, ritratti jew filmati? 

Ara wkoll

Reklam
Reklam
EnglishMaltese