fbpx

IL-BIEB TAL-KANTINA It-tielet parti – Storja miktuba minn Jenson Elsworth

Miktub minn
Reklam

Għaddew jumejn minn dakinhar li dort dawra fil-kantina. Ma tantx kelli ċans ninżel minħabba l-fatt li nannti kienet kemmxejn ma tiflaħx. Minħabba f’hekk ma rifsitx mill-bieb l’ barra. Kif ukoll bdejt nieħu ħsiebha. Kelli sebgħa mitt sena biex ninżel hemm isfel, imma bżajt li tgħajjatli n-nanna għal xi għajnuna u ma nismagħhiex. B’hekk qtajtha li nistenna l-waqt opportun u stennejt aktar.

Għaddew ftit ta’ jiem oħra u n-nanna kienet b’saħħitha reġgħet, allura tista’ timmaġina x’għamlet. Telqet il-quddies bħala parti mir-rutina tagħha. Kelli kollox preparat. Inżilt ġirja sal-kantina qisu l-bieb ħa jaħrabli. Dan il-bieb kien misteru enormi għalija u kont determinata biex niskopri x’hemm mistoħbi ġewwa. U fl-aħħar inkun naf dwar din is-segretezza kollha. F’daqqa t’għajn ftaħt il-bieb. Ma stajtx nistaporti aktar. Bejn imbeżża’ li nsib xi ħaġa mhux sabiħa għal għajnejja u bejn entużjasta ħalli niskopri xi sigriet. Li naf li dik il-karba tal-waħx li smajt l-aħħar darba m’għoġbitni xejn. Imsomma, inżilt dan l-imbierek taraġ ftit ftit. Domt nieżla ftit. Kien estiż, iżda fl-istess ħin bdejt ninżel inkiss inkiss. Qisu moħħi qiegħed jgħidli biex ma nagħmilx ħoss żejjed. It-terrur li qed inħoss qiegħed jagħmel tiegħu.

Rajt id-dawl. It-taraġ irritani u waħħaxni. B’hekk ħaffift. Faċċata ta’ dan il-kurutur kien hemm bieb bil-vireġ tal-ħadid imsakkar. Minn hemm beda jgħaddi d-dija ta’ dawl li beda jillumina l-kurutur. Kif kont miexja lejh ilmaħt żewġ bibien; wieħed fuq ix-xellug qadim, arkajk, l-injam kważi mfarrak u ż-żebgħa migrufa kollha u wieħed fuq il-lemin lewn isfar skur, il-pum tal-bieb jidher qisu ġdid, u ż-żebgħa qisha għadha kemm tieħu passata riċenti. Moħħi l-għaref imur għall-akbar misteru, u mort għal tax-xellug.

Kif dħalt, bilkemm stajt nara xi ħaġa. Xegħlt l-iswiċċ li kont fortunata li ħadem. Id-dawl beda jteptep. Kienet kamra mimlija mbarazz tal-baħar; dgħajsa, moqdief, kaxxa tal-injam kbira u ħwejjeġ ta’ baħħara fost oħrajn. Fuq dgħajsa minnhom kien hemm isem familjari: ‘Ċikku’. Din il-kamra ta’ nannuwi. Kemm hi mirakuluża. Mdaqqsa. Qisek dħalt f’mużew qadim. Għalkemm affaxxinanti, il-ħajt jidher qisu ħa jaqa’, inkwatri mdendlin, l-art tfaqqa’, kullimkien trab u l-ixkafef qishom ħa jinqasmu. Għidt aħjar noħroġ il-barra għax jidher li kollox ħa jaqa’ daqs kemm hi qadima l-kamra u l-ġebla mielħa. Fil-fatt qabel ma ħriġt waqa’ armarju bl-ixkafef u waqgħu bosta bottijiet taż-żebgħa. Tlaqt għal kamra l-oħra għax twerwirt.

Il-kamra tal-lemin kienet pjuttost spazzjuża wkoll. Ikkulurita. Ġugarelli qodma stivati fuq xkaffa. U oġġetti divini. Jidhru prezzjużi minħabba l-fatt li qedgħin ġo vetrina qishom ħadd ma jista’ jmisshom. Kamra ta’ xi tifel qed nara. Mimlija oġġetti tas-subien. Imma l-mistoqsija hi “ta’ min?” Fir-rokna hemm lapida, b’ritratt ta’ tifel gustuż ta madwar tmien snin. Bl-isem “Salvinu Zammit”. “Zammit kunjom in-nanna u n-nannu. Imma dan it-tifel min hu?”, għidt bejni u bejn ruħi.

Tkompli.

Reklam

Ixxerja din il-paġna

Share on facebook
Facebook
Share on twitter
Twitter
Share on linkedin
LinkedIn

Ara wkoll

Reklam
Reklam

Ipparteċipa f'TEK TEK

Għandek xi kitba, ritratti jew filmati? 

Ara wkoll

Reklam
Reklam
EnglishMaltese