fbpx

ŻMIEN LI MA NINSA QATT – Storja miktuba minn Jenson Elsworth

Miktub minn
Reklam

Fejn telaq iż-żmien uniku ta’ ċkuniti? Kont ngħid fittex nikber u nsir adult. Imma issa. Issa li wasal iż-żmien, nimmisja l-mumenti momentarji li kelli ma’ sħabi. Il-logħob, il-praspar, id-daħk u l-bużż li konna nieħdu flimkien. Żmien efemeru. Żmien li temm malajr. Żmien minsi minn uħud. Imma mhux minni żgur.

Niftakar noħroġ mawra mal-Birgu. Niltaqgħu l-pjazza ħelwa l-għandna. U nibdew il-parlati waqt li nimxu mixja estiża mal-belt. Nibdew mix-xatt sabiħ, mimli dgħajjes u individwi jieklu f’ristoranti. Niefqu ftit f’nofs ix-xatt, ngħidu kelmtejn fuq biċċa art li konna nsejħulha ‘penisola’. Wieħed jaħseb għalxiex… għax qisha biċċa art minura ħierġa mix-xatt fejn konna noqgħodu nirilassaw u noqgħodu npaċpċu. Minn hemm nipproċedu lejn l-aħħar tax-xatt. Hemm ħanut ċkejken, b’imwejjed tal-injam kbar u tondi. Konna nixtru x’nixorbu. Aktar skuża biex ma jkeċċunix imma msomma. Kont noħroġ is-sett tal-logħob li jkolli. Dejjem b’xi logħba ġdida. U konna noqgħodu nilgħabu hemm. Min jarana jgħid “ara dawk hemm x’inhuma jagħmlu” u probabbli jidħku bina. Iżda, aħna nafu kemm konna nidħku u nagħmlu memorji b’dawk il-logħob. Logħob ta’ diskussjoni, gost u manipulazzjoni. Lilhom konna nfittxu. Wara siegħa jew anke tnejn, konna nkomplu nimxu lejn it-Toqba tal-Birgu.

Jinstema’ isem umoristiku. Imma konna u għadna ngħożżuh wisq. Nimxu bil-mod, nammiraw il-madwar. Minn hemm inkomplu. Immorru lejn il-famuż Mandraġġ (tal-Birgu). L-istess. Nammiraw is-swar u d-djar li hemm. Minn hemm inkomplu għaddejjin sakemm naslu ħdejn il-ħanut diminuttiv iżda kulħadd jaf bih, għand ‘Feliċ’. Konna nixtru xi ‘juice’ tal-ħawħ (il-Frutana) u xi ċikkulata. Nibqgħu tilin. Ngħaddu ħdejn ‘Cafe Riche’ u nersqu lejn Bormla. Dak iż-żmien kien hemm il-grawnd żgħir miftuħ u konna noqgħodu hemm. Nintefgħu mal-art ħdejn xulxin. Niflu l-istilel u l-kwiekeb. Xi tnejn jew tlieta minna kienu joqgħodu jparlaw. Waqt li l-kumplament, konna nitfgħu kanzunetta u noqgħodu nkantaw jew niżfnu mar-ritmu tagħha. Ma konniex żeffiena ta’ barra minn hawn. Imma għalina kien mument fejn nintilfu mir-realta’ u niżuffjettaw. Sens ta’ allegrija. U feliċita’. Konna nitgħaxqu f’mumenti hekk.

Meta jibda jsir il-ħin konna mmorru lejn il-lokazzjoni minn fejn bdejna, il-pjazza. Konna nilgħabu logħba ħarba. Logħba tradizzjonali li ma ninsa qatt. Niftakarni dejjem konna inkunu l-istess timijiet: is-subien kollha u l-bniet u jien. Il-bniet kienu l-ħbieb tal-qalb u ma kont nidejjaq xejn magħhom. Niftakar nidħku u nagħmlu praspar f’waqthom. Jew nistaħbaw bejn karozza u ħajt u ngħoxew bid-daħk jekk jgħaddi xi ħadd minn ħdejna. Jew ninżlu minn taraġ li tant indumu naħsbu li ħa ninqabdu mit-tim l-ieħor li vera jilħqu jiġu u jaqbduna. Mmm. Anke nitkellem fuqu, jaqbadni sens ta’ nostalġija u ferħ kbir. Nikteb u nitbissem.

TMIEM

Reklam

Ixxerja din il-paġna

Share on facebook
Facebook
Share on twitter
Twitter
Share on linkedin
LinkedIn

Ara wkoll

Reklam
Reklam

Ipparteċipa f'TEK TEK

Għandek xi kitba, ritratti jew filmati? 

Reklam
Reklam
EnglishMaltese