fbpx

L-Għajdut – Storja miktuba minn Mandy Cilia

Miktub minn
Reklam

Id-Dar tal-faċċata kienet inxtrat minn koppja li kien għad kellhom żewġt itfal żgħar. Ma kinux mir-raħal għalhekk ħadd ma kien jafhom. Kulħadd beda jitkellem fuqhom u ħafna kienu dawk li ppruvaw jitkixxfu biex isiru jafu iżjed.

Il-Mara bħal donnha spikkat aktar għax kienet fuq fomm kulħadd. Kien hemm ħafna li ma ħadux grazzja magħha mingħajr lanqas biss jafuha jew imqar kellmuha darba u dan kollu għax kienet iżżommha. L-aktar li kienu jinzertawha kien fejn l-iskola meta tmur twassal jew tistenna lit-tfal. Bħas-soltu n-nisa kollha kienu joqgħodu qaqoċċa u kulħadd jgħid tiegħu.

‘’Kemm tridha din il-mara, imkabbra wisq’’

‘’U issa biex twassal it-tfal hemm bżonn tilbes dak l-ilbies?’’

‘’U xi ngħidu għal xagħarha dejjem miġbur pulit’’

‘’Aħseb u ara meta tħallih lixx u mniżżel f’din is-sħana kollha biex issa tmur id-dar u lanqas toħroġ minn hemm’’

‘’Ma ndumux ma nisimgħu li daqt tinfired minn mar-raġel’’

‘’Tgħid mhux se tkun marti u nħalliha ġġib ruħha hekk’’

U l-għajdut kienu jibqgħu għaddejjin. Hi kienet tgħaddi minn quddiemhom, issellem u tibqa’ miexja.

Hekk kif tasal id-dar kienet tmur tbiddel u tibda l-faċendi tal-ġurnata u ma’ nofsinhar bumm ikollha tieqaf biex tistrieħ. Malli jsir il-ħin biex terġa’ tmur għat-tfal kienet tqum u tmur tbiddel imbagħad minn fuq it-twaletta tieħu l-parrokka u tmur quddiem il-mera biex tirranġa xagħarha sew. Meta tilbes il-parrokka kienet tħossha ħafna aħjar għaliex tħossha kompluta u għal ftit tinsa l-kanċer qerriedi li għandha.

U kif tħossha sodisfatta kienet titbissem tbissima żgħira li timliha b’kuraġġ u terħilha lejn l-iskola ħerqana biex terġa’ tara lil uliedha u tgħannaqhom magħha. 

Reklam

Ixxerja din il-paġna

Share on facebook
Facebook
Share on twitter
Twitter
Share on linkedin
LinkedIn

Ara wkoll

Reklam
Reklam

Ipparteċipa f'TEK TEK

Għandek xi kitba, ritratti jew filmati? 

Reklam
Reklam
EnglishMaltese